பாம்பொன்றாய் ஊர்ந்து
கொண்டிருந்த நினைவுகளை
கொத்தித் தின்ன
கழுகாய் ஆக வேண்டி இருக்கிறது
மேட்டாங்காட்டு
மொட்டை மரத்தினடியில்
பாம்பின் நிழலாய் மாறிப் போவது
ஆயிரங்கால் ஊர்தல்கள்
இரை ஆகும் கழுகுக்கெல்லாம்
முன்பொரு காலத்து பாம்பின்
ஞாபகம்
வயதாகி வாழ்வது
மொட்டை மரத்தை தூக்கி சுமப்பது
கழுகுக்கு எப்படியோ
எனக்கெல்லாம் பாரம் தாங்கவில்லை
செத்த பாம்போ பெயருக்குத் தான்
செத்திருக்கிறது
பெயருக்காவது செத்திருக்கிறது………!
