1. சிறகுள்ள உயிர்க்காடு
வெளிச்சமாக்கிக் கொடுக்கும் விலகல்
நிரந்தரத்தின் சொல் அறையை
நோட்டம் விடுகிறது
அர்த்தங்களின் அறை நுழைய
சென்று திரும்பும் மனம்
மனம் திரும்பச் செல்லாத வழியாகிடும்
பயிற்சிக்குப் பழக்க
நிற்கிறோம்
கால் கடுக்கக் கடுக்க
முன் சொன்னவை
முதல் உதவியவை
முன்னுக்கு வந்தவையென
முன்
முன்னென முண்டியடிக்கும்
அறை நிறைந்திருந்த மனதாகி எதிரொலிக்கிறது
ஏதுமற்றதில் வந்து நிற்பது
நிற்பது
நடக்கப் பணிக்கும் காலத்தின் முன்
விலகல்
விட்டில் பூச்சியின் பாடம்
வெளிச்சம் திரித்தூண்ட
நிழல் உறைந்த காலம்
அறை கடந்து பறக்கிறது
எல்லையற்றை வான் நோக்கி
***************
2.சுழற்சி மாற்றம்
நதியாக இருந்துகொள்ள மனம் துடிக்கிறது
துச்சமென வீசிபட்ட உறவின்
சிறு கல் மௌனம்
தேக்கத்தில் அமிழ்ந்து
போகுமிடம் யாவும் அடிபட்டு
அகப்பட்ட வனப்பு
கைசேர்க்கிறது
கரைக்கு அப்பாலும் கடல் இருப்பதை
***************
3.படிப்பினையின் பருவம்
காலம் வெவ்வேறு முகமாகி
கற்றுத்தரும் பாடம்
ஒரு வயது
முதிர்ச்சி கூடக்கூட
எடுபடாத வகையில்
திருப்பம்
நேர்செய்கிற புரிதலின் மேல்
ஏற்றிவைக்கிறது இன்னொரு புரிதலை
சுமை
அறிந்தவொன்றிலிருந்து
அறியா ஒன்றுக்கு மாறுவதின்
அழுத்தம்
எடைக்கூட்டி பறக்கவிடுகிறது
வயதை
தவிக்கும் இந்த வாழ்விலிருந்து
தரவுகள் தராத நிம்மதியை
கற்றுக்கொடுக்கிறது
காத்திருப்பின் சுருங்கிய தோல்
கவளம் தின்றால் போய்விடும்
பசிதான்
கடத்தி வருகிறது
கற்றுக்கொண்டத்தின் கடந்தகாலங்களை
***************
