கட்டுரைகள்
Trending

Perfume (The Story of Murderer) – திரைப்பார்வை

யா. பிலால் ராஜா

ஹோமோசேபியன்ஸ்க்கும் பரிணாம வளர்ச்சியடைந்த இன்றைய நவீன மனிதனுக்கும் இடைப்பட்ட ஆதிகுகை மனிதனுக்கு ஐம்பொறிகளின் ஒன்றான மூக்கின்வழி மோப்பசக்திதான் முக்கிய உணர்வு உறுப்பாக இருந்தது. குகை/ மரம்/ வனப்புதர்களை அண்டி வாழ்ந்து வந்த மனிதக்கூட்டம் விலங்கு /தீ / மற்றும் பிறமனிதக் கூடங்களின் அருகாமையை மோப்பத்தால் உணர்ந்து எச்சரிக்கை கொண்டது. பின் உணர்வுறுப்புகளின் தலையாயதும் உயிரியல் ஆச்சரியங்களுள் ஒன்றான கண்ணின் காட்சியுணர்வு மேம்பட, அதிசிறந்த மோப்பத்திறன் கொஞ்சம் கொஞ்சமாகக் குறைந்து இன்று நாம் வாழும் அறையின் நறுமண/நாற்ற/சமையல் மணம் அறிவதைத் தவிர வேறெதற்கும் நீட்சியுறாத ஒன்றாக ஒரு அறையளவுக்கு சுருங்கிவிட்டது மனித மோப்பத்திறன்.

Perfume (The Story of Murderer ) திரைப்படத்தின் நாயகன் ஜீன்-பாப்டிஸ்ட் (Ben Whishaw) அப்படியொரு அதிவிசேஷ மோப்ப உணர்வு கொண்ட சிசுவாக 18ம் நூற்றாண்டில் பிரான்ஸின் சேரி ஒன்றின் மீன்/மாமிச சந்தையில் கொடூர நாற்றங்கொண்ட கழிவுகளுக்கிடையில் பிறக்கிறான், பிறந்த சிசுவை மீன் கழிவுகளுக்கிடையில் தள்ளிக் கொல்ல முயன்றதாக தாய் தூக்கிலிடப்பட, ஜீன் ஒரு அனாதை விடுதியில் வளர்ந்து பின் தோல் பதனிடும் ஒரு இடத்தில் கொத்தடிமையாக்கப்படுகிறான், பிறந்தது முதல் பதின்பருவம் வரை அவன் உணர்ந்தது எல்லாமே மோசமான கொடூரமான நாற்றங்கள்தான், ஆனால் அவனுக்கிருக்கும் அதிநுட்ப வாசனை உணர்வினால் அவற்றை வேறுபடுத்தி அறிந்துகொள்ளும் திறன் நாளுக்குநாள் அதிகரிக்கிறது, சிலகாலம் கழித்து அவன் எஜமானனால் பாரிஸுக்கு வேலைக்கு அழைத்துச் செல்லப்படுகிறான். அந்நகரத்தில் நல்ல பல வாசனைகளை உணர அவன் மோப்ப உணர்வு உக்கிரம் கொள்கிறது. அங்கு ஒரு வாசனை திரவிய (perfume) கடையின் வழியாக நறுமணங்களின் மீது மனிதருக்கிருக்கும் காதலை உணர்கிறான். அக்கடையின் ஒவ்வொரு சீசாவிலிருக்கும் வாசனை மூலங்களை தூரத்திலிருந்தே பிரித்துணர அவனால் முடிகிறது. அப்போது எதிர்பாராத விதமாக அவனை ஒரு அற்புத வாசனை கடக்கிறது, மோப்ப உணர்வால் அதனை துரத்திச் செல்ல அது ஒரு பெண் உடலின் வாடையென அறிகிறான். ஒரு இருள்போல அவளை அணுகி அவ்வாடையை கிரகிக்கும்போது அவள் திடுக்கிட்டு அலற, அவளை அமைதியாக்கும் போராட்டத்தில் உயிரிழக்கிறாள்.

ஆனால் அந்த அசம்பாவிதம் அவனை பாதிக்கவில்லை. அவள் ஆடை களைந்து அவ்வுடல் வாசனையை முழுவதும் துய்க்கிறான். பெண்ணுடல் நறுமணம் அவனை உன்மத்தம் கொள்ளச் செய்கிறது.ஆனால் அவ்வாடையை எப்படிக் கைகொள்வது எனத் தெரியாமல் அங்கிருந்து செல்கிறான்.

பின் அந்நகரின் மிகச்சிறந்த இத்தாலிய வாசனை திரவிய வல்லுனரும் வியாபாரியுமான கியூசெப் பால்டினியை தனது நறுமண உருவாக்கத் திறமையால் கவர்ந்து மலர்களிடமிருந்து நறுமணத்தைப் பிரித்தெடுக்கும் நுட்பம் கற்கிறான். அத்துடன் கியூசெப் இதுவரை மனிதன் கண்டுபிடித்த 12 வகையான வாசனைகளின் அடிப்படையில்தான் அனைத்து நறுமணங்களையும் உருவாக்கினான் எனவும் பிரபஞ்சத்தின் எல்லா பூதங்களுக்கும் (Element ) கண்ணுக்குப் புலப்படாத ஓர் பரிமாணம் (Dimention ) இருப்பதுபோல் வாசனைகளுக்கும் மனிதன் கண்டுபிடிக்காத ஒன்று இருக்கலாம் எனவும் இருந்தால் அதுவே 13வது வாசனையாக இருக்கவேண்டுமெனவும் சொல்கிறார்.

ஏற்கனவே வழக்கமான கியூசெப் கற்றுத்தந்த முறையில் அனைத்து பொருளிலிருந்தும் வாசனையைப் பிரித்தெடுக்க முடியாமல் தோற்று விரக்தியிலிருக்கும் ஜீன், நுகரும்போதே அதிஉன்மத்த சொர்க்க இருப்பை உணர்த்தும் அந்த 13வது வாசனையை உருவாக்கும் முடிவுடன் அந்நகரிலிருந்து கிளம்புகிறான்.சில காலம் காட்டில் வாழ்ந்துவிட்டு ஓர் நகரைஅடைகிறான், அந்நகரின் பெரும் செல்வந்தர் அன்டோயின் ரிச்சிஸின் (ஆலன் ரிக்மேன்) மகள் லாராவின் உடல்வாசனைதான் தான் உருவாக்கப்போகும் 13வது நறுமணத்தின் மூலமென நுகர்ந்துணர்கிறான். ஆனால் முன்னதாக 12 நறுமண மூலங்களை தயாரிக்கும் முயற்சியில் 12 பெண்களை கொலை செய்து பிரத்தேகமான முறையில் அவர்களின் உடல் மனத்தை தைலமாக்கி சேமிக்கிறான். பின் கடும் காவலையும் மீறி லாராவைக் கொன்று 13வது நறுமணத்தை உருவாக்கி முடிக்க, பாரிஸ் போலீசால் கைது செய்து மரணதண்டனையளிக்கபடுகிறான். தண்டனை நாளன்று ஆயிரக்கணக்கானோர் கூடியுள்ள நகரின் மத்தியில் அந்த 13வது நறுமணத்தைப் பரப்ப, கூடியிருப்போரும், நீதி மற்றும் காவல் கனவான்களும் சுயஉணர்விழந்து பித்தேறி நிலைக்கு மாறி அவனை தேவதூதுவனென புகழ்ந்து குற்றமற்றவன் என்றுரைத்து பின் நிகழ்த்தும் காட்சி இதுவரை உலகின் எந்த ஓர் திரைப்படத்திலும் இடம்பெறாதது.

இறுதிக்காட்சியில் பாரீஸ்ஸில் தான்பிறந்த மீன்சந்தைக்குச் சென்று குப்பியில் மீதமுள்ள அந்த 13வது நறுமணத்தை தன்மீது முழுவதும் ஊற்றிக்கொள்ள அங்கிருக்கும் சிறு கும்பல் அவ்வாடையில் ஈர்க்கப்பட்ட அவன்மீது மொய்க்கிறது, சிறிது நேரத்தில் அக்கூட்டம் அகல அங்கு ஜீன்-பாப்டிஸ்ட் இருந்ததற்கான எந்த தடயமும் இல்லை, அந்த வாசனைக் குப்பியைத் தவிர. அதிலுள்ள கடைசி துளியும் மண்ணில் விழ திரை இருள்கிறது.

ஏற்கனவே “Run Lola Run” மூலம் உலக சினிமா ரசிகர்களுக்கு அறிமுகமான ஜெர்மனிய இயக்குனர் Tom Tykwer -ன் ‘Perfume’ என்கிற நாவலை தழுவிய படைப்பான இப்படத்தின் இயக்கமும், ஒளிப்பதிவும், இசையும், நடிப்பும் சினிமா ரசிகர்கள் பார்த்தே ஆகவேண்டிய படங்களின் பட்டியலில் ஒன்றாக இடம்பிடிக்கிறது செய்கிறது “Perfume”.

மேலும் வாசிக்க

தொடர்புடைய பதிவுகள்

Leave a Reply

Your email address will not be published. Required fields are marked *

Back to top button